பதிவர்கள் சந்திப்புக்காக உழைக்கும் கரங்களுக்கு நன்றி!நன்றி!

என்கனவு நினைவாகி விட்ட தென்றே-நான்

    எழுதினேன் முன்னரே பதிவு ஒன்றே

நன்மனம் கொண்டோர்கள் பலரும் கூட-மேலும்

    நலம்பெற பல்வேறு வழிகள் நாட

தன்னலம் இல்லாது ஓடி வந்தார்-இன்று

    தடையற்று ஆதரவு மிகவே தந்தார்

அன்னவர் கரம்பற்றி போற்று கின்றேன்-அவர்

    அன்புக்கு அடிமைநான் சாற்று கின்றேன்

விருந்துண்டு வாழ்கின்ற வயதா? இல்லை!-நாளும்
    விட்டுவிட்டு வருகிறது! நோயின் தொல்லை!
மருந்துண்டு வாழ்கின்ற வாழ்க்கை தானே!-ஆயின்
    மனத்தளவில் என்றென்றும் இளைஞன் நானே!
இருந்துண்டு இயன்றவரை சங்கப் பதிவை- பற்றி
     எழுதினேன்! வலைதன்னில்! எனினும், முதுமை
பெருந்தொண்டு செய்திட தடையாம் ஆமே!-எனவே
    பொறுப்பேற்பீர்! தக்கோரே! வருக! வருக!

தங்கத்தால் ஆகாதச் செயலைக் கூட-வரும்
     தடைமுற்றும் தூளாகி விரைந்து ஓட
சங்கத்தால் ஆகுமென முன்னோர் சாற்ற-அவை
    சரியென்றே கொண்டதுடன் பின்னோர் போற்ற
அங்கங்கே தொழில்தோறும் சங்கம் தோன்ற-நல்
    அடிப்படை உரிமைகள் மனதில் ஊன்ற
சிங்கத்தைப் போன்றின்று நடக்கக் காண்பூர்-உம்
    சிந்தையிலும் அதுபோன்றே உறுதி பூண்பீர்

தன்நலமே இல்லாமல் சேவை செய்ய-கொள்கைத்
    தடுமாற்றம் இல்லாமல் அன்பைப் பெய்ய
பொன்மனமே கொண்டவரே வருக! வருக-நல்
    பொதுநலமே சேவையெனத் தருக! தருக!
எத்தனைப்பேர் வருவார்கள் தெரிய வில்லை-ஆனால்
    ஏற்றயிடம் உறுதிசெய்தே விட்டோம் ஒல்லை
சித்தமதை, வருகைதனைச் செப்ப வேண்டும்!-உடன்
    செயல்பட அதுவொன்றே எம்மைத் தூண்டும்!

                                       புலவர் சா இராமாநுசம்