கண்ணென வளர்க்கும் நாள்போலும்-என்றும் கவிதைகள் தந்திட மேன்மேலும்

உண்ணும் உணவா உறவுகளே-என்னை
உங்கள் மறுமொழி வரவுகளே
கண்ணென வளர்க்கும் நாள்போலும்-என்றும்
கவிதைகள் தந்திட மேன்மேலும்
திண்ணம் இதுவென நம்புங்கள்-உணர்ந்து
தெளிவீர் எனக்கது தெம்புங்கள்
எண்ணம் பல்வகை தோன்றிடுமே-அதனால்
எழுத்தில் மனமது ஊன்றிடுமே!

புலவர் சா இராமாநுசம்

இருகை கூப்பி தொழுகின்றேன்-என் இதயத்துள் குமுறி அழுகின்றேன்

அன்பின் இனிய உறவுகளே-தினம்

    அலைவழி காணும் உறவுகளே

துன்பில் துடித்தேன் சிலநாளாய்-எனை

    துளைத்திட வேதனை கூர்வாளாய்

இருகை கூப்பி தொழுகின்றேன்-என்

   இதயத்துள் குமுறி அழுகின்றேன்

ஒருகை தட்டின் இலையோசை-இதை

   உணர்ந்திட வேண்டுதல் என்னாசை

பலநாள் முயற்சியே சந்திப்பாம்-அதில்

  பழுதெனில் வருவது நிந்திப்பாம்

நலமுற வேண்டுவ ஒற்றுமையே-உடன்

  நமக்குள் களைவோம் வேற்றுமையே

நடந்தது நடந்ததாய் போகட்டும்-இனி

  நடப்பது நலமாய் ஆகட்டும்

கடந்ததை பேசிட வேண்டாமே-மன

  காயத்தை மேலும் தூண்டாமே

வருவீர் அனைவரும் ஒன்றாக-தமிழ்

  வலைப்பதி குழுமம் நன்றாக

தருவீர்! வாய்ப்பு உறவுகளே-சிரம்

  தாழ வேண்டுவேன் உறவுகளே

சிறுதுளி வெள்ளமாய் போயிற்றாம்-சென்னை

  செயல்மறவர் தம்கைப்பட ஆயிற்றாம்

வருவது ஒன்றே உம்பணியாம்-உமை

  வாழ்த்தி வணங்குதல் எம்பணியாம்

                              புலவர் சா இராமாநுசம்