மழையே மழையே வாராயோ-எங்கள் மனம்குளிர் நல்மழைத் தாராயே

மழையே  மழையே வாராயோ-எங்கள்

   மனம்குளிர் நல்மழைத் தாராயே

அழையார் வீட்டுக்குப்  போகின்றாய்-நாங்கள்

   அழைத்தும்  வராது ஏகின்றாய்

விழைவார் தம்மிடம் போகாமல்-நாளும்

   வேதனைப்  பட்டு  சாகாமல்

பிழையார் செய்தார்? பொறுப்பாயா –உந்தன்

   பிள்ளைகள் எம்மை வெறுப்பாயா!!?

புலவர்  சா  இராமாநுசம்

ஆட்டுகின்றார் மத்தியிலே அமர்ந்து கொண்டே ஆடுகின்ற தமிழ்நாட்டு ஆட்சி கண்டே!

ஆட்டுகின்றார் மத்தியிலே அமர்ந்து கொண்டே
ஆடுகின்ற தமிழ்நாட்டு ஆட்சி கண்டே
நாட்டுமக்கள் அனைவருமே அறிந்து கொள்ள
நாட்களுமே ஒவ்வொன்றாய் நகர்ந்து தள்ள
காட்டுகின்றார் அடிமையென ஆள்வோர் சுகமே
காத்திடவே வெட்கமது இன்றி அகமே
ஓட்டுதனைக் கேட்பதற்கு வருவார் அன்றே
உணர்த்திடுவோம் மறவாது உணர நன்றே

புலவர்  சா  இராமாநுசம்

எண்ணிய எண்ணியாங்கு எய்தலினிது!

எண்ணிய எண்ணியாங்கு எய்தலினிது-நல்ல
இல்லறம் ஒன்றேதான் என்றுமினிது!
பெண்மையை மதித்தலே உலகிலினிது-ஏதும்
பிழையின்றி பேசலே மொழிக்கினிது!
கண்ணியம் காத்தலே மாந்தர்க்கினிது-கல்வி
கற்றாரைக் காமுற்று காணலினிது!
புண்ணியம் தேடலே வாழ்விலினிது-செய்யும்
பொதுவாழ்வு தன்னிலே நேர்மையினிது!

கொல்லாமை விரதாமாய்க் கொள்ளலினிது-நளும்
கொள்கையின் வழிநாடி நடத்தலினிது!
இல்லாமை நோயின்றி இருத்தலினிது-தம்மின்
இயல்பாலே காண்போரைக் கவர்தலினிது!
சொல்லாமை பொய்தன்னை அறத்திலினிது-எதுவும்
சொந்தமெனச் சொல்வதை மறத்தலினிது!
கல்லாரைக் கற்றோராய் ஆக்கலினிது-மூடக்
கயவரைக் கண்டாலே விலகலினிது!

புலவர்  சா  இராமாநுசம்

சமன்செய்து சீர்தூக்கும் கோல்போல வேந்தர் சரியாக நீதியில் ஆண்டிட மாந்தர்!

சமன்செய்து சீர்தூக்கும் கோல்போல வேந்தர்
சரியாக நீதியில் ஆண்டிட மாந்தர்
அமரின்றி அனைவரும் அமைதியில் வாழ்வார்
ஆண்டவன் அவனென்று ஆனந்தம் சூழ்வார்
தமரென்றே எல்லோரும் தம்முள்ளே உறவே
தக்கது என்பாரே! அறியாராம் கரவே
இமயோரும் காணத இன்பத்தைப் பெறுவர்
இறைவாநீ! என்றுமே மன்னனைத் தொழுவர்!

பல்லோரின் பகையாலே பாதகம் இல்லை
பலமிக்க மன்னர்க்கு வாராது தொல்லை
நல்லோரின் துணையின்றி நாடாள முயலா
நல்லது கெட்டது அறிந்திட இயலா
வல்லவ ரானாலும் வழிதவறிப் போக
வாய்ப்புண்டு அதனாலே தீமைகள் ஆக
சொல்லவும் தடுக்கவும் பெரியாரின் துணையே
பெரிதென்று அறிவீரே அதற்கில்லை இணையே!

புலவர் சா இராமாநுசம்

அன்பின் இனிய உறவுகளே! – உம் அனைவரின் வாழ்த்தென் வரவுகளே!

அன்பின் இனிய உறவுகளே! – உம்
அனைவரின் வாழ்த்தென் வரவுகளே
இன்பின் இருப்பிடம் என்னுளமே –என
இணையம் தந்தது அவ்வளமே
துன்பின் நிழலும் என்மீதே –என்றும்
தொடாது காக்கும் உம்மீதே
என்பின் பிரியாச் சதைபோன்றே-நாளும்
இருந்திட , வாழ்த்தென் புத்தாண்டே!

புலவர் சா இராமாநுசம்

பொய்யும் புரட்டும் இல்லாது –வாழின் பூமியில் புகழச் சொல்லேது!

காலம் ஓடும் நிற்காதே-வீண்

  காலம் கடத்தல் ஆகாதே!

ஞாலம் சுற்றும்! யாராலே-தினம்

   நடப்பது இயற்கைப் பேராலே

ஆலம் கூட மருந்தாகும்-தூய

  அன்பே ஏழைக்கு விருந்தாகும்

கோலம் அழகு! வாசலுக்கு-நல்லக்

   கொள்கை அழகு! பேசலுக்கு

திட்டம் இட்டே வாழ்வீரே-உரிய

   தேவைக்குச் செலவும் செய்வீரே

பட்டம் பதவி எனத்தேடி-மனிதப்

   பண்பை மறந்துப் பணம்நாடி

கொட்டம் போட வேண்டாமே-வெற்றிக்

    கொடிகட்டிப் பறக்க ஈண்டாமே!

எட்டிக் கசத்தல் இயல்பன்றோ-இதை

   எண்ணா செயல்தரும் துயரன்றோ

மற்றவர் தம்மின் குறைகண்டே-அவர்

   மனமும்நோக அதை விண்டே

செற்றம் கொண்டிடச் செய்யாதீர்-தீயச்

   சொற்களை அம்பென எய்யாதீர்

குற்றம் செய்யார் யாருண்டே-நம்

   குறைகளை ஆயின் நிலைகொண்டே

சுற்றம் சூழ வாழ்வோமே!-சுய

   சிந்தனை தன்னில் ஆழ்வோமே

வையம் தன்னில் வாழ்வாங்கு-நாம்

   வாழ என்றும் புகழோங்கும்

செய்யும் செயலைத் தெளிவாக-நாம்

    சீர்பட செய்யின் களிவாக

உய்யும் வழியே உருவாகும்-அதற்கு

   உண்மை, உழைப்பு எருவாகும்!

பொய்யும் புரட்டும் இல்லாது –வாழின்

   பூமியில் புகழச் சொல்லேது!

                   புலவர் சா இராமாநுசம்

பழகிவிட்டால் எல்லாமே சரியாய்ப் போகும் –இதை, பார்த்தோமே ! மின்வெட்டு ! அதுபோல் ஆகும்!

பழகிவிட்டால்  எல்லாமே  சரியாய்ப் போகும் –இதை,

   பார்த்தோமே ! மின்வெட்டு ! அதுபோல்  ஆகும்!

அழுதுகிட்டே  மீன்பிடிக்கும்  மீனவன்  போல -அவன்

   அல்லலுக்கு  விடிவுண்டா  என்றும்  சால!

பழகிவிட்டால்  எல்லாமே  சரியாய்ப் போகும் –இதை,

   பார்த்தோமே ! மின்வெட்டு ! அதுபோல்  ஆகும்!

பொழுதுமுட்ட  குடிக்கின்றான்   கவலை  அகல –இல்லம்

   போனபின்னர்  அவன்செயலை  எடுத்துப்   புகல!

விழுதுகளாம்  பிள்ளைகளும்  மனைவி  என்றே –படும்

    வேதனையை  விளக்குவதும்  எளிதும்  அன்றே!

பழகிவிட்டால்  எல்லாமே  சரியாய்ப் போகும் –இதை,

   பார்த்தோமே ! மின்வெட்டு ! அதுபோல்  ஆகும்!

                                             

நஞ்சுண்ட  விவசாயி  கண்டோம்  இன்றே –வரும்

    நாட்களிலே  நடக்குமிது  காணும் ஒன்றே!

பஞ்சுண்டு  நெய்வதற்கும்  ஆலை யுண்டே –ஆனா

    பலநாளாய்  மூடியது   அரசின்  தொண்டே!

பழகிவிட்டால்  எல்லாமே  சரியாய்ப் போகும் –இதை,

   பார்த்தோமே ! மின்வெட்டு ! அதுபோல்  ஆகும்!

கஞ்சுண்டு  வாழ்வதற்கும்  தொட்டி  கட்ட –அரசு

     கருணையுடன்  மானியமே  நம்முன்  நீட்ட!

நெஞ்சுண்டு  நன்றிமிக  வாழ்வோம்  நாமே –பெரும்

      நிம்மதியாய்  அஞ்சலின்றி  நாளும்  தாமே!

பழகிவிட்டால்  எல்லாமே  சரியாய்ப் போகும் –இதை,

   பார்த்தோமே ! மின்வெட்டு ! அதுபோல்  ஆகும்!

                       

                          புலவர்  சா  இராமாநுசம்

இன்னும் எதற்கோ நடிக்கின்றாள்-தன் இதயம் திறக்க மறுக்கின்றாள்

தொலைந்தது மீண்டும் வந்ததுவே-கனவில் 
தொல்லையா இன்பம் தந்ததுவே 
கலைந்தது அந்தோ தூக்கம்தான்-அவளைக் 
கண்முன் காணா ஏக்கந்தான் 
விளைந்தது மீண்டும் கனவுவர-அவள் 
விட்டுச் சென்றதை நினவுதர 
அலைந்தது அந்தோ மனம்வீணே-முக 
அழகில் காண்பது மிகநாணே 

என்னுள் அவளே இருந்தாலும்-நல் 
இருவிழி தந்திடும் மருந்தாலும் 
பொன்னுள் பதித்த மணிபோல-தினம் 
புலம்பும் நெஞ்சின் பிணிமாள 
மன்னும் உயிரும் உடலோடு-அவள் 
மறுத்தால வாழ்வே சுடுகாடே 
இன்னும் எதற்கோ நடிக்கின்றாள்-தன் 
இதயம் திறக்க மறுக்கின்றாள் 

எத்தனை காலம் ஆனாலும்-என் 
இளமை அழிந்து போனாலும் 
சித்தமே சற்றும கலங்காது-விருப்பம் 
செப்பிடும் வரையில் தூங்காது 
இத்தரை தன்னில் வாழ்ந்திடுவேன்-நான் 
இறுதியில் ஒருநாள் விழ்ந்திடுவேன் 
பத்தரைப் பொன்னே நீவருவாய்-தீரா 
பழியும் வருமே வாய்திறவாய் 

புலவர் சா இராமாநுசம்

           நீண்ட,  பழைய  நாட்குறிப்பு,  மீள்பதிவு

வடநாடுச் சென்றும் வாளாய் திரும்பிட

வடநாடுச்  சென்றும்  வாளாய்  திரும்பிட

கொடநாடும்  சென்றாராம்  இன்றும் – திடமான

திட்டமின்றி!  மக்கள்  தினந்தோறும்  தேம்பியழ

வெட்டும்மின் வெட்டே விளம்பு

ஆள்வோர்க்கும்  துன்புண்டா ஆண்டோர்க்கும்  துன்புண்டா

மாள்வார்கள்  மக்கள்தான்  மாறாதா –நாள்போதல்

சொல்லும்  தரமல்ல  சோகம்தான்  என்றுமினி

கொல்லும் நிலைதானே  கூறு

இப்படியே  போனாலே  என்செய்வோம்  சொல்லுங்கள்

ஒப்பிடவே  ஏதுண்டா? உண்மையிலே –செப்பிடவே

பஞ்சம்  பசிப்பிணி   பரவிடுமே  ஊரெங்கும்

நெஞ்சம்  பதற  நிதம்

எங்கும்போர்  என்றேதான்  ஏங்கும்  நிலைதானே

பொங்கும் செயல்கண்டே  புண்படுமே – தங்கமென

வாங்கும்  பொருளெல்லாம்  வானுயர  ஏறவிலை

தாங்கும்  நிலையுண்டா  தான்!

                    புலவர்  சா இராமாநுசம்

ஆங்கிலப் புத்தாண்டே வருக ! –வாழும் அனைவர்க்கும் ஆனந்தம் தருக

ஆங்கிலப்  புத்தாண்டே  வருக ! –வாழும்

    அனைவர்க்கும்  ஆனந்தம்  தருக

ஏங்கியே  ஏழைகள்  வாழ – குடிசை

    இல்லாமல்  வளமனைச்  சூழ

தாங்கிட  அன்னாரை நீயும் –இன்பம்

    நிலையாக  தடையின்றிப்  பாயும்

தீங்கின்றி  கழியட்டும்  ஆண்டே –மக்கள்

    தேவைகள்  நிறைவேற  ஈண்டே

இயற்கையின்  சீற்றங்கள்  கண்டே –எங்கள்

   இதயமும்  உடைவது  உண்டே

செயற்கையால்  வருவதே  அறிவோம் – இனி

   செய்வதை  ஆய்ந்துமே   செய்வோம்

இயற்கையின்   கோபத்தை  நீக்க –எம்மின்

    இன்னல்கள்  இல்லாது  போக்க

முயற்சியும்  செய்வாய  ஆண்டே – மக்கள்

    முன்னேற  தடையின்றி  ஈண்டே

உழவனும்  அழுகின்றான்  இங்கே – அவன்

   உழைத்தாலும்  பலன்போதல்  எங்கே

தழைத்ததா   அவன்வாழ்வு  இல்லை – தினம்

    தவித்தவன்  பெறுவதோ  தொல்லை

பிழைத்திட  பருவத்தில்  மாரி – வந்து

   பெய்திடச்  தருவாயா  வாரி

செழித்திட  உலகமே  ஆண்டே –உடன்

    செய்திட  வேண்டினோம்  ஈண்டே

இல்லாமை   நீங்கிட  வேண்டும் – ஏழை

    இல்லாத   நிலையென்றும்  வேண்டும்

கல்லாதார்  இல்லாமை   வேண்டும் – கல்வி

    கற்றாரை  மதித்திட  வேண்டும்

கொல்லமை  விரதமாய்  வேண்டும் –நற்

    குணங்களும்  வளர்ந்திட  வேண்டும்

எல்லாரும்  வாழ்ந்திட ஆண்டே –நீயும்

    ஏற்றது  செய்வாயா  ஈண்டே!

                 புலவர்  சா  இராமாநுசம்