இடுவீர் பிச்சை இடுவீரே-கல்வி
ஏழைகள் கற்க விடுவீரே
கெடுவீர் இன்றேல் ஒருநாளே-இது
கேடெனக் களையின் எதிர்நாளே
தொடுவீர் ஏழைகள் நெஞ்சத்தை-உடன்
தொலைப்பீர் கல்வியில் இலஞ்சத்தை
விடுவீர் ஏழைகள் நிலைஉயர-அவர்
வேதனை நீங்கி தரமுயர
திறமை இருந்தும் பயனின்றி-வீணே
தேம்பிட வாழல் மனங்குன்றி
அறமா கருதிப் பார்ப்பீரே-பணம்
அளித்தால் எவரையும் சேர்ப்பீரே
தரமே அற்றவர் போனாலும் –அந்தோ
தருவீர் இடமே!ஆனாலும்
வரமே பொற்றவர் அவர்தானா-ஏழை
வாழ்வே குட்டிச் சுவர்தானா
இல்லோர் கல்வி இல்லோரா-இதை
எடுத்து எவரும் சொல்லாரா
நல்லோர் எண்ணிப் பாருங்கள்-இது
நாட்டுக்கு நலமா கூறுங்கள்
வல்லோர் வகுத்ததே வாய்க்காலா-ஏழை
வாழ்வை அழிக்கும் பேய்க்காலா
கல்லார் என்றும் அவர்தான-கேட்கும்
கவிதை இதுவென் தவற்தானா
ஏழையின் கண்ணீர் பாரென்றீர்-அங்கே
இருப்பது இறைவன் தானென்றீர்
பேழையுள் இருக்கும் பாம்பாக-கட்டிப்
பிணைத்திட பணமது தாம்பாக
வாழையின் அடிவரும் வாழையென-அவன்
வாழ்ந்தே மடிவது கொடுமையென
கோழையாய் கிடப்பவன் எழுந்தாலே-பொங்கி
குமுறும் எரிமலை ஆவானே
| Tweet |
