Saturday, October 17, 2015

ஏழரை நாட்டுச் சனிபோல-இன்றும் ஏறின பெட்ரோல் விலைசால!


ஏழரை நாட்டுச் சனிபோல-இன்றும்
ஏறின பெட்ரோல் விலைசால!
ஏழைகள், நடுத்தர வர்க்கம்தான்-அவரே
என்றும் காண்பது நரகம்தான்!
வாழைக்கு கூற்றம் காய்போல-நாமே
வழங்கிய வாக்கும் அதுபோல!
கோழைகள் ஆனோம் பயனென்ன!?-இந்தக்
கொடுமைக்கு விடிவு இனியென்ன?


பால்விலை ஏறிற்று என்செய்தோம்-அதனால்
பதறியும் கதறியும் பயனுண்டா!
தோல்வியே என்றும் தொடர்கதையே-சுமையாம்
தோளொடு நடப்பது தலைவிதியே!
பேருந்து கட்டணம் ஏறிற்றே-மக்கள்
பேசியும் புலம்பியும் மாறிற்றா?
பேருந்து கண்டதும் ஓடுகின்றோம்-இடமே
பிடித்திட முயன்று தேடுகின்றோம்!

மின்விசைக் கட்டணம் விண்முட்ட-துயரம்
மேலும் தேளாய் நமைகொட்ட!
என்வினை இதுவோ என்றேங்கி-தினமே
இல்லறம் நடத்தக் கடன்வாங்கி!
தன்வினை ஆற்ற இயலாமல்-நாமும்
தவிப்போம் ஏதும் முயலாமல்!
பொன்நிகர் வாக்கை இனியேனும்-நீரே
போடுமுன் சிந்திக்கத் துளியேனும்!

புலவர் சா இராமாநுசம்

Tuesday, October 13, 2015

நல்முறையில் புதுக்கோட்டை சென்று வந்தேன்-நிகழ்வு நடந்த முறை அனத்துமே இனிக்கும் செந்தேன்!





நல்முறையில்  புதுக்கோட்டை  சென்று  வந்தேன்-நிகழ்வு
     நடந்த  முறை  அனத்துமே  இனிக்கும்   செந்தேன்!
வல்லமையே கொண்டவராம் இளையோர்  அணியே-நேரில்
      வந்தவர்கள் அறிவார்கள்  அவர்தம்   பணியே!
சொல்லரியப்  புகழ்பெற்றார் முத்து   நிலவன்-சற்றும்
     சுயநலமே ஏதுமில்லா, உழைத்த   தலைவன்!
இல்லைநிகர் இல்லையென வந்தோர்   தம்மை- தூய
     இதயமுடன் வரவேற்றார் வணங்கி  எம்மை!

நாவிற்கு, இனியசுவை நல்கும்  விருந்தே-பலரும்
      நவின்றிட்ட  சொற்பொழிவும்   நல்ல மருந்தே!
காவிற்கு அழகூட்டும்  மலர்கள்  போன்றே –மிகவும்
     கனிவுடனே பணிசெய்த  தொண்டர்  சான்றே!
பாவிற்குள் அடங்காத  பெருமை  ஆகும்- முற்றும்
      பகர்ந்திடவே! இயலாத  அருமை  ஆகும்!
நோவிற்கு ஆளாகி  இருந்த  போதும் – வருகின்ற
      நோக்கம்தான் குறியாக  மனதில்  மோதும்!

அகம்கண்டு  முகம்காணா  பலரைக்  கண்டேன்-மேலும்
        அவரோடு  உரையாடி மகிழ்வே  கொண்டேன்!
இகம்தன்னில்  பிறந்ததிட்ட  பயனைப்  பெற்றேன்-நாளும்
         இணையத்தால்  இத்தைய  உறவை உற்றேன்!
நகத்தோடு இணைந்திட்ட  சதைபோல்  இன்றே-புதுகை
     நடத்திட்ட பதிவர்விழா  குறையில்  ஒன்றே!
சுகத்தோடு   அனைவருமே  இல்லம்  சென்றார்-பன்முறை
     சொல்கின்றேன்   வணக்கமென  நன்றி !  நன்றி!

புலவர்  சா  இராமாநுசம்

இவற்றையும் வாசிக்கலாமே.

Related Posts Plugin for WordPress, Blogger...