தனிமை என்னை வாட்டிடவே-கற்ற தமிழாம் அன்னை மீட்டிடவே!

தனிமை என்னை வாட்டிடவே-கற்ற

   தமிழாம் அன்னை மீட்டிடவே

கனிமை மிக்கோர் கருத்துரையும்-தேனில்

   கலந்த பாலென மனதுறையும்

இனிமை மிகவே எண்ணத்தில்-என்றும்

  இதயம் புகவே வண்ணத்தில்

நனிமிக கவிதைகள் எழுதிடுவேன்-உறவை

  நாளும் பணிந்து தொழுதிடுவேன்

புலவர் சா இராமாநுசம்

அண்ணல் காந்தி பிறந்தநாள் இன்றே !

அண்ணல் காந்தி பிறந்தநாள் இன்றே
  அடிமை விலங்கை அகற்றினார் அன்றே
  திண்மை அகிம்சையாம் அறவழி என்றே
  தேடிக்  கொடுத்தார் விடுதலை ஒன்றே
  உண்மையைத் தனது உயிரெனக் கொண்டே
  உத்தமர் காந்தி செய்தார் தொண்டே
  மண்ணில் பிறந்த மாந்தரில் எவரே
  மாகாத்மா வாக மதித்தது!  இவரே!
 
  நிறவெறி தன்னை நீக்கிட வேண்டி
  நீலத்திரைக் கடல் அலைகளைத் தாண்டி
  அறவழிப் நடந்து ஆப்பிரிக்க நாட்டில்
  அல்லல் பட்டது காண்போம் ஏட்டில்
  தீண்டா மையெனும் தீமையை ஒழிக்க
  தீவிரம் காட்டிட சிலரதைப் பழிக்க
  வேண்டா மையா சமூக கொடுமை
  விட்டது இதுவரை நம்செயல் மடமை
 
  இடுப்பினில் கட்ட ஆடையும் இன்றி
  ஏழைகள் இருந்திட உள்ளம் குன்றி
  உடுப்பது இனிநான் வேட்டியும் துண்டென
  உள்ளம் நொந்தவர் உறுதியே பூண்டவர்
  எடுத்தார் விரதம் இறுதி வரையில்
  இறந்து வீழ்ந்தார் முடிவெனத் தரையில்
  கொடுத்தனர்  பாவிகள் குண்டாம்  பரிசே
  கொன்றான் மதவெறி கொடியவன் கோட்சே
 
  எத்தனை நாட்கள் சிறையில் காந்தி
  இருந்தவர் எனினும் எண்ணமே சாந்தி
  புத்தனாய் வாழ்ந்தார் போற்றிட உலகம்
  பதவியை நாடா பண்பினில் திலகம்
  சத்திய சோதனை வாழ்வாய்க் கொண்டே
  சரித்திரம் எழுதிய பெருமையும் உண்டே
  உத்தம உன்புகழ் உலகினில் வாழ்க!
  உன்திருப் பெயரொடு அகிம்சையும் சூழ்க!

                     புலவர்  சா இராமாநுசம்

இன்னலே முதுமை மறக்க வில்லை

அமைதி இன்றி மனமேதான்-ஏனோ
அல்லல் படுவதோ? தினமேதான்!
சுமைதான் வாழ்க்கை என்றேதான்-நாளும்
சொல்லிட நடப்பதும் இன்றேதான்
எமையார் எவரென கேட்டிடவே-யாரும்
இல்லா துயர்மிக வாட்டிடவே
இமையே மூடினும் உறக்கமில்லை-மூளும்
இன்னலே முதுமை மறக்கவில்லை

புலவர் சா இராமாநுசம்

முகநூலில் வந்தவை!

உறவுகளே
துடப்பக் கட்டைக்கும் விளம்பரம் செய்யும் அளவிற்கு
நம் நாடு முன்னேறியுள்து ! பார்த்தீர்களா! மாண்பு மிகு
பிரதமர் அவர்களின் தூய்மை இந்தியா திட்டம் இனி
வெற்றி பெறும் என்பதில் ஐயமில்லை

மத்திய ,மாநில அரசுகள் தாம்
கொண்டு வரும் திட்டங்கள் செயல் படுதா என்பதைக் கவனிக்காமல் மேன்மேலும் திட்டங்களை அறிவிப்பதால் என்ன பயன் ? அறிவித்த திட்டங்களை
செயல்படுத்த வழிகளை ஆய்ந்து நடைமுறை படுத்தஆவனl
செய்வது அரசின் கடமையாகும் படிப்பறிவு குறைந்த
பாமர மக்கள் அதனை அறிந்து கடை பிடிக்க அரசுதான்
முயல வேண்டும்

மூட நம்பிக்கையை ஒழிக்கத்தான் கர்நாடகச் சட்டசபை சட்டம் போட்டது, ஆனால்அதற்காவே இங்குதோன்றிய ,தந்தை பெரியார் ,அண்ணா வழிவந்த திராவிட இயக்கதில் முக்கிய தலைவர்களான மாறன்
சகோதரர்கள் நடத்தும் சன் டிவியோ நாள்முழுதும் ஒளிபரப்பும் தன சீரியல்கள் மூலம் மூடநம்பிக்கையை
வளர்த்துக் கொண்டிருப்பது முறைதானா?? இதனைத்
தடுக்க வேண்டிய கடமை செயல் தலைவர்,தளபதி அவரகளுக்கு உண்டல்லவா! செய்வாரா?

உறவுகளே
நாம் என்ன பாவம் செய்தோமோ தெரியவில்லை!
நாங்கள் பொய்தான் சொன்னோம் மன்னித்து விடுங்கள் என்று பொதுக்கூட்ட மேடையில் கொஞ்சமும் கூசாமல் கூறுகின்ற அமைச்சர்கள்
ஆட்சி இங்கே நடக்கிறது!இதைவிட கேவலம் வேறு
உண்டா? இனி இறைவன்தான் நம் நாட்டைக் காப்பாற்ற வேண்டும்

புலவர்  சா  இராமாநுசம் 

நேற்றுவரை முன்னிருந்தார் போன வழியே – ஐயா நீங்களுமே.! போவதென்ன!? வருதல் பழியே

மாற்றமில்லை மாற்றமில்லை ஏதும் இல்லை-ஆட்சி
மாறினாலும் இதுவரையில் மாறாத் தொல்லை
ஆற்றுவதாய் தேர்தலிலே சொன்ன தெல்லாம் –மோடி
அளித்திட்ட வாக்குறுதி நீர்மேல் சொல்லாம்
தூற்றுவதாய் எண்ணாதீர் போகும் போக்கே –எடுத்து
துல்லியமாய் காட்டுதந்தோ உற்று நோக்க
நேற்றுவரை முன்னிருந்தார் போன வழியே – ஐயா
நீங்களுமே.! போவதென்ன!? வருதல் பழியே

புலவர்  சா இராமாநுசம்

ஆழ்துளை கிணரும் வற்றியதே-எம்மை அளவில் துயரது பற்றியதே!

ஆழ்துளை கிணரும் வற்றியதே-எம்மை
அளவில் துயரது பற்றியதே
வாழ்வது எவ்வண் வான்மழையே-உடன்
வாராது போவது ஏன்மழையே
வீழ்வது மழைத்துளி நீரன்றே –பொங்கி
வீழுவது இருவிழி நீரொன்றே
சூழ்வது உண்டே! மழைமேகம் –கலையும்
சுடர்கண்ட பனியாம் அதன்வேகம்

புலவர் சா இராமாநுசம்

சமன்செய்து சீர்தூக்கும் கோலை போன்றே -மன்றம் சரியாக செயல்படின் விளைதலும் நன்றே -நாளும்

சமன்செய்து சீர்தூக்கும் கோலை போன்றே -மன்றம்
சரியாக செயல்படின் விளைதலும் நன்றே -நாளும்
அமர்கின்ற உயர்நீதி மன்றங்கள் தாமே-எடுத்து
ஆராயின் ஊழலை ஒழித்திட போமே - அவரே
தமரென்ற போதும் தவறென்று கண்டால்-சற்றும்
தயங்காது தண்டணை தருவதாய் கொண்டால் -என்றும்
இமயோரும் வாழ்திட இறைவனாய் ஆவார்-அவரே
எல்லோரும் போற்றிட இதயத்தில் வாழ்வார்

புலவர் சா இராமாநுசம்