அன்னையும் பிதாவும் முன்னறி தெய்வம்!
அனைவரும் அறியின் வாழ்வில் உய்வோம்!
மன்னவ ராயினும் மறத்தல் இயலாம்
மறந்தவர் மனமோ வளமிலா வயலாம்!
பின்னை அவர்தமை பேணி மேலும்
பிள்ளைகள் என்போர் பணிசெய நாளும்
தென்னை மரமாய்ப் பெற்றவர் தாமே
தினமும் காத்து வளர்தவர் ஆமே!
ஆலயம் தொழுவது சாலவும் நன்று
ஆன்றோர் கூறிய மூதுரை, இன்று!
சீலமாய் எண்ணி செயல்படின் நன்மை
செப்பவும் வேண்டுமா? வருவது உண்மை!
கோலமே போடுவார் புள்ளிகள் இடுவதும்
கோபுரம்கண்டே கன்னத்தைத் தொடுவதும்
ஞாலமே சுற்றலும் நாயகன்செயலே!
நம்பியே எதையும் செய்திடமுயலே!
ஈயார் தேட்டைத் தீயார் கொள்வர்
ஈத்து உவப்பவர் இறையெனச் சொல்வர்!
வாய்தனை அடக்கி வைத்திடின் வெல்வர்
வாழ்வில் அமைதி வழியெனச் செல்வர்!
நோய்நொடி இன்றே நேர்வழி சென்றே
நொந்தவர் துயரம் போக்கிட நன்றே!
தாய்மை குணமே தனக்கெனக் கொண்டே
தன்னலம் இன்றி செய்வீர் தொண்டே!
புலவர் சா இராமாநுசம்
