ஓடு மனிதா நீஓடு-இவ், உலகம் அழியா வழிநாடு!

ஓடு மனிதா நீஓடு-இவ்     

  உலகம் அழியா வழிநாடு!

தேடு மனிதா நீதேடு-உன்

  தேவை எதுவோ அதைநாடு!

சுயமாய் சிந்தனை செய்வாயா-உன் 

  சொந்தக் காலில் நிற்பாயா?

பயமே இன்றி செயலேற்று-நல்

  பயன்தரக் காண்பாய் நீயாற்று!

தோல்வி வரினும் துவளாதே-உடன்   

   தொடர்ந்து முயலத் தயங்காதே!

வேள்வி என்றே பாடுபட- வரும்

   வேதனை முற்றும் தவிடுபட!

முயற்சி ஒன்றே உருவாக்கும்-நம்    

   முன்னோர் மொழிந்தத் திருவாக்கும்!

அயற்சி போக்கும் அறிவாயா-நாளும்

  அவ்வழி செயலும் புரிவாயா!

இன்னார் இனியர் பாராதே-ஏதும்     

   இல்லை என்றே கூறாதே!

உன்னால் முடிந்தது, ஒரளவே-நீ

  உதவின் அதுவே பேரளவே!

அன்பின் வழியது உயிர்நிலையே-நம்    

   ஐயன் சொன்னது பொய்யிலையே!

என்பும் தோலைப் போர்த்தியதே-அன்பு

   இல்லா உடம்பு ஆகியதே!

காலமும் இடமும் கருதிடுவாய்-ஏற்றக்    

  காரிய மாற்ற முனைந்திடுவாய்!

ஞாலம் போற்ற வாழ்ந்திடுவாய்-நாடு

   நலம்பெற பல்வழி சூழ்ந்திடுவாய்!

                   புலவர் சா இராமாநுசம்

 

 

Tweet